ការដេកលក់ស្កប់ស្កល់ គ្រប់គ្រាន់ ធ្វើឲ្យស្បែកតឹងណែននិងមើលទៅស្រស់ថ្លា
សុខភាព : ប្រសិនជាអ្នកចង់ឲ្យមើលទៅកាន់តែមានភាពទាក់ទាញ រឿងល្អបំផុតដែលអ្នកអាចធ្វើបាន គឺដេកឲ្យបានស្កប់ស្កល់នៅពេលយប់។ អ្នកវិទ្យាសាស្ត្រមកពីសាកលវិទ្យាល័យ
Karolinska Institute របស់ប្រទេសស៊ុយអែតបាននិយាយថា ខ្លួនគឺជាអ្នកទី១ ដែលបង្ហាញនូវការគាំទ្រតាមបែបវិទ្យាសាស្ត្រចំពោះគំនិតនេះ។ នៅក្នុងការពិសោធក្រុមអ្នកវិទ្យាសាស្ត្របានថតរូបអ្នកស្ម័គ្រចិត្តចំនួន២៣ នាក់ បន្ទាប់ពីពួកគេបានដេកលក់យ៉ាងស្កប់ស្កល់អស់៨ម៉ោង។ ២ថ្ងៃមុនការពិសោធ បណ្តាអ្នកស័គ្រចិត្តទាំងអស់មិនត្រូវបានអនុញ្ញាតឲ្យជក់បារី ឬផឹកគ្រឿងស្រវឹងឡើយ ហើយអំឡុងការពិសោធពួកគេមិនប្រើម្សៅលាបមុខទេ។
ពួកគេត្រូវបានសុំឲ្យបន្ធូរអារម្មណ៍ ធ្វើទឹកមុខធម្មតានៅពេលថតរូប។ បន្ទាប់ពីនោះមក មនុស្ស៦៥នាក់បានចេញមកវាយតម្លៃរូបថតដែលមានការទាក់ទាញនិងបាន រកមើលរូបមួយៗថា តើរូបណាមួយដែលបង្ហាញពីការហត់នឿយ ឬមិនហត់នឿយ មានសុខភាពល្អ ឬគ្មានសុខភាពល្អ។ សម្រាប់មនុស្សនៅក្នុងរូបថតទាំងនេះ អ្នកដែលដេកមិនគ្រប់គ្រាន់ត្រូវបានគេវាយតម្លៃថា មានសុខភាពមិនល្អ គ្មានការទាក់ទាញនិងមើលទៅគួរឲ្យធុញទ្រាន់ធៀបទៅនឹងរូបថតអ្នក ដែលដេកលក់បានស្កប់ស្កល់និងគ្រប់គ្រាន់។
វេជ្ជបណ្ឌិត John Axelssonមកពីនាយកដ្ឋាន Clinical Neuroscienceបាននិយាយថា ៖ «ប្រសិនជាអស់លោកអ្នកចង់មើលទៅប្រកបដោយ ភាពទាក់ទាញនិងសុខភាពល្អ គួរតែទទួលទានដំណេកឲ្យបានគ្រប់គ្រាន់ក្នុងពេលយប់ហើយម្យ៉ាងវា អស់លុយតិចជាងការកែសម្ផស្ស»។ ការរកឃើញនេះត្រូវបានបោះពុម្ភផ្សាយនៅក្នុងព្រឹត្តិប័ត្រវេជ្ជ សាស្ត្រអង់គ្លេស
British Medical Journal’s Chrismas៕
Post a Comment