យុវជនកម្ពុជា២២នាក់ទៅសិក្សាស្វែងយល់សេដ្ឋកិច្ច និងវប្បធម៌ជប៉ុន

យុវជនកម្ពុជា២២នាក់ទៅសិក្សាស្វែងយល់សេដ្ឋកិច្ច និងវប្បធម៌ជប៉ុន 

យុវជនកម្ពុជាចំនួន២២រូបបានទៅធ្វើទស្សនកិច្ចសិក្សាស្វែងយល់ពីដំណើរការសេដ្ឋកិច្ចជប៉ុនជាមួយបណ្តាប្រទេសផ្សេងៗ និងផ្លាស់ប្តូរបទពិសោធន៍អំពីវប្បធម៌ជប៉ុន។
         សេចក្តីថ្លែងការណ៍របស់ស្ថានទូតជប៉ុននៅកម្ពុជា បាននិយាយថាក្រសួងការបរទេសជប៉ុន បានរៀបចំដំណើរទស្សនកិច្ចរបស់យុវជនកម្ពុជា យុវជនបណ្តាប្រទេសអាស៊ាន ទីម័រខាងកើត និងប្រទេស ឥណ្ឌា ក្រោមកម្មវិធីបណ្តាញផ្លាស់ប្តូរសិស្ស និស្សិត និងយុវជន រវាងប្រទេសជប៉ុន និងបណ្តាប្រទេសអាស៊ីខាងកើត ដែលហៅកាត់ថា JENESYS 2016 ចាប់ពីថ្ងៃទី២៥ ខែកញ្ញា ដល់ថ្ងៃទី៤ ខែតុលា។
         សេចក្តីថ្លែងការណ៍នេះ បានបន្តថាម្មវិធី JENESYS 2016 មានគោលបំណងជម្រុញការយល់ដឹង និងទំនុកចិត្តគ្នាទៅវិញទៅមកក្នុងចំណោមប្រជាជនជប៉ុន និងបណ្តាប្រទេសដែលចូលរួម និងដើម្បីកសាងមូលដ្ឋានគ្រឹះនៃកិច្ចសហប្រតិបត្តិការនិងចំណងមិត្តភាពនាពេលអនាគត។
         សេចក្តីថ្លែងការណ៍នេះ បានបញ្ជាក់ថាដំណើរទស្សនកិច្ចទៅកាន់ទីក្រុងតូក្យូ និងខេត្តហ្វូគូស៊ីម៉ា គឺដើម្បីចូលរួមកម្មវិធីផ្លាស់ប្តូរ ក្រោមប្រធានបទរង “តម្លៃម្ហូបអាហារកែច្នៃ”។ 

         សេចក្តីថ្លែងការណ៍នេះ បានបន្ថែមថាយុវជនគ្រប់រូបក៏នឹងមានឱកាសធ្វើទស្សនកិច្ចនៅសារមន្ទី តូក្យូ-អេដូ និងមជ្ឈមណ្ឌលបច្ចេកទេសកសិកម្ម ក៏ដូចជាទទួលបាននូវបទពិសោធស្នាក់នៅផ្ទះជាមួយជនជាតិជប៉ុន ព្រមទាំងទទួលបាននូវបទពិសោធអំពីវប្បធម៌ជប៉ុន។ 

         សេចក្តីថ្លែងការណ៍នេះ ជឿជាក់ថាយើងខ្ញុំសង្ឃឹមថាអ្នកចូលរួមនឹងយល់ដឹងអំពីទំនាក់ទំនងសេដ្ឋកិច្ចរវាងប្រទេសជប៉ុន និងបណ្តាប្រទេសផ្សេងៗទៀត ហើយបន្ទាប់ពីត្រលប់មកវិញ ពួកគេនឹងចែករំលែកបទពិសោធរបស់ពួកគេទៅកាន់ប្រជាជនកម្ពុជាអោយកាន់តែទូលំទូលាយ។